A rivoluzione é Pulecenella

Nu juorno Pulecenella, comm’e sempe, réva spettaculo pe’ mmiezo a via. Attuorno a isso ce steve na folla enorme:   a gente reréva, é ccriature ó uardàveno cu l'uocchie 'ncantate. Antrasatto a rint'a na casa accanto a lloro se sentette nu sparo. Nu lampo é fuoco passaje pe’ mmiez' a gente. Propio vicino a Pulecenella na uagliona se schiantaje pe’ terra, senza n'allucco, senza nu lamiento. Pulecenella a pigliaje 'nbraccio e s'a strignette ó pietto. O core suojo era na preta. Rimanette senza ciato e cu l'uocchie perdute. A gente alluccava.

A ambulanza sunava comm' e na resperata. Ma nun ce steve cchiù niente a fà. Pulecenella se luvaje a màscara, se stracciaje a cammisa sporca é sanghe e a chillu mumento cagnaje cumpletamente. A chillu juorno accumminciaje nata vita. O puosto ra màscara che faceva rìrere, s'appennette ò cuollo nu ritratto é chella guagliuncella morta accisa, cu na scritta:

Mò abbasta!!!

Tutte é juorne, a tutte l'ore se metteva annanzo ò Municipio, annanzo ò Palazzo Riale, mmiez'o Marcato. A gente o ricunusceva e a poco a poco se furmava na folla sempe cchiù grossa. Pò, senza rícere na parola, sagliéveno pe' scale ro' Palazzo San Giàcumo, rinto o Duomo, 'ncoppo a Prefettura o rinto ó Tribunale.

A principio o Sìnnaco s'annascunneva, o Prefetto se ne jeva, o Cardinale nun se 'mpurtava, o Procuratore se ne futteva. Ma ogni vota a folla criscéva.

Na rumméneca matina chelli gente arrivàjeno a régnere o stadio é San Paulo.

Ma a squadra nun ghiucava, a gente nun parlava, pure l’aria se fermava.

Nun se sparáveno tracche e bott' a muro, nun se faceva nu minimo rummore.

A rinto all'altuparlante, finalmente se sentette na voce - a vocia soja:

Fino a quanno vulimme tirà annanze accussì, senza na Legge?

E’ pròpio na schifezza!

Fino a quanno imma campà comme zòcchele e scarrafune mmiezo a sta munnezza?

Fino a quanno imma sentì é cumanne é st' incapace, ca fanno sempe peggio?

Aizammo a capa. Vuttammo é mmane: facìmmece arrispettà!

Comm’e na scarica elettrica passaje pe’ mmiezo a folla. A chillu mumento esatto a città cagnáie. Ogni napulitano se senteva ó patrone é Nápule, ó uardiane ra città. Se furmájeno é Cumitate. Gruppe é cittadine pigliáveno a munnezza abbandunata e a purtáveno rinto ò Maschio Angioino, annanz’ ó Municipio. Squadre é guagliune cu’ l'acqua e co’ ssapone luvávene tutte é fetenzie a coppo é mure. E meglie prufessioniste cuntrulláveno é cunte ró Comune e, quanno truváveno é 'mbruoglie, chiammáveno a guardie é finanza o l'avvucate. A Piazza Garibaldi, o puosto é chillu caos é tutte é juorne, facètteno fà nu 'distretto senza fruntiere, arò se puteva truvà a gente e a robba é tutte o munno, senza scippe e senza 'mbruoglie. Comme pe’ miràcule Nàpule turnaje a essere na metròpole é nu paese civile. Pulecenella nun ce pensaje ddoje vote. Se mettette a màscara antica e turnaje pe’ tutta Nápule ché smorfie, é battute, a fantasia ca a tanti siécule ce fanno rifléttere e ce pòrteno allegria.

(©Arò stà Nàpule - GN2010)